Neujahrskarten 1947 - 1959

No allwei draht si insa Welt,
i moanat fast no schneller,
sie is no finster und entstellt,
do werd 's schö langsam heller.

Scho wieda is a Jahr vorbei,
's war hungri und armseli,
do so an Kriag voschmerzt net glei,
des geht nur ganz allmähli.

Zerscht ham s' uns täuscht und drangsaliert,
dann umerzog'n und g'schliffa
und schließli in an Kriag neig'führt
und z'letzt auf uns na pfiffa.

Iatz sitz ma in a saubern Brüah!
Wia wern ma außifind'n?
An Arbat ham ma wia no nia,
da müaß ma uns schö schind'n.

Von vorn fangt jeda wieda o
bescheid'n und kloawinzi,
weil 's nur a so in d' Höh geh ko -
und alles andre find' si'.

D'Wallberger woll'n an Auftakt geb'n
und wieda z'sammakemma.
I moan, es kunnt a g'selligs Leb'n
von uns dös Unguat nehma.

Drum Leut ruckt's z'samm, i bitt Enk schö
und helft's Enk aa ananda,
na werd 's ja dengerscht wieda geh,
mia san do starke Manda.

Dös Boarischsei is echte Liab
zum Herrgott und zur Hoamat,
und is aa ' Weda schiach und trüab,
es macht uns do net loamat.

I ko Enk Leut dös oa nur rat'n,
teat's Sitt' und Brauch hochhalt'n!
I will Enk allesamt einlad'n,
dö Junga und dö Alt'n:

Ehrt's Enka Tegernseer Tracht!
Helft's mit, laßt's mi net bitten
und lebt's, wia 's uns a Freud do macht,
in Brauch und guat'n Sitt'n.

Koan Nagellack, koan Bubikopf
und aa koa rote Gosch'n!
Bei uns trag'n d' Weiberleut an Schopf!
Mehr z'sag'n, waar laar's Stroh drosch'n.

Iatz b'schliaß'n mia dös alte Jahr
und hoff'n wieda weita.
Wo 's Weda gar grob kumma war,
werd 's iatz vielleicht do heita.

I wünsch Enk Alle, liabe Leut,
im neuen Jahr an Frie'n!
Vui Guat's und wieda bess're Zeit
Sei jedem bald beschieden!

Egern-Rottach, im Dezember 1946

Die Wallberger

Verein zur Erhaltung der Volkstracht
Peter Schiffmann, 1. Vorstand.

Der Peter zwirbelt an der Schnurrn
und schaugt sinnierat vor si hi,
ma hört ihn räuschpern und dann knurrn:
"I muaß scho, weil i Vorstand bi!"

"Was muaßt denn Peter", fragt sei Wei',
"redst wieda von der CSU,
da gibts do allwei allerlei,
wann d' so politisch bist, wia Du."

Da Peter zwirbelt immer no
an seiner Schnurrn und draht s' in d' Spitz,
na schaugt er seine Leni o
und hebt si ganz schö stad vom Sitz:

"Na, na iatz hast di gründli täuscht!"
Und fallt scho wieda ins Sinniern,
worauf sei Stimmstock heisa kreischt:
"I muaß zum Neujahr gratuliern!

D' Wallberger wart'n auf mein Gruaß
und spitz'n, was i iatza sag!
Und weil i iatzt was sag'n muaß,
dös macht ma so vui Plag.

Ma soll de Leut a Hoffnung gebn,
daß s' net no ganz vozweiflat wern
und eahnan Muat aufs neu belebn
und net auf de Voführa hörn.

Und siehgst, da tuat ma si heunt schwar!
Da fuader Du an Stall voi Viech,
san alle Fuadakripp'n laar.
Scho gar alls geht oam gegn an Strich!

As Bier is z'dünn, as Fett is z'weng,
d'Kartoffi san wia Schussa kloa,
as Brot ziagst mit da Klei' in d'Läng.
Was hast in d'Haferln einiz'toa?

Am Horizonz schiabt Politik
de dick'n, schwarz'n Wolk'n zsamm,
uns beutln s' aba aa am Gnick,
daß mia gar nia nix z'lacha ham.

Da prost de Freund zum Neujahr o,
wünscht eahna Glück und guate Täg,
na moanands' glei, du frotzelst s' no
und kriagst am End' no schöne Schläg!"

Da kimmt da Sepp rei' bei der Tür,
und hängt sein Huat aufs große Gweih.
Dem jammert er das Gleiche vür,
was er grad gsagt hat zu seim Wei'.

Da kratzt da Sepp si hinterm Ohr
und schweigt si schö stad aus.
Do dick kimmts aus seim Mäu dann vor:
"Dös Richti, Peter, dös muaß raus!

Mia ham an Willn, an guat'n Muat,
laßt's uns nur grad an d'Arbat hi,
na werd glei alles wieda guat,
so wahr, als i da Seppei bi.

Mia schaffa 's Eis'n und de Kohln,
mia schuastern, schneidern, baun und webn,
des war ja do zum Teifi holn,
kam nacha net an anders Lebn.

Mia schlossern, schreinern, zimmern wuid,
entrümpln und mia säubern d'Stadt,
dann zoagt si bald an anders Buid,
an dem a jeds sei Freud na hat.

Do oan, den müaß ma ganz votreibn,
Sankt Bürokratius muaß naus,
der tat uns dennascht ganz aufreibn
und gfehlt waar 's, breitat der si aus.

Des san de Wünsch zum neua Jahr!
De müaß'n do an jed'n gfalln.
Waar ebba des net wunderbar,
kaam 's endli so, wia 's mia uns maln?"

Da Peter zwinkert mit de Augn,
fahrt mit da hand am Kernzl ra.
A seller Glückwunsch ko eahm taugn.
Drum steht er da.

1 9 5 0

Neujahrsgruß

des Vereins zur Erhaltung der Volkstracht

"Die Wallberger"

Egern-Rottach

Und wieda is a Jahrl uma
Sagt do da Winta zon Suma
Drum liawe Leitl'n loßt's enk song
Dama uns vosteh und a guat votrong.

Habt's an Feind - na gebt's eam d'Hand
Und seid's wieda guat mit'nand
Es gibt nix schenas wia insane Berg
Denn de glab i, daß a jeda ehrt.

Nachad hob' i no a bißl was zon song
Do moan i werd's oi dageng nix hom
An Boi, den hama no net glei'
Da wart ma gor glei' bis an Mai.

Do wer ma an Johrdog mit'n Boi zamanehma
Liawe Woibergla, ge'i, do derz na oisam kema
So - und jetza mach ma gar
Und wünschn enk Woibergla
a recht a guats nei's Johr!

Der Ausschuß der Wallberger

Zum nei'n Johr!

A' heu'r woll' ma go enk kemma,
Um euch eins're Neujohrsbotschaft zu benenna,
Awa, net bloß wei s' Jahrl wida is vorbei,
Dösmoi hama a a Jubilierats dabei:

Wer har di auffibaut - du Kreiz dort ob'n
So stolz auf des Berges Schneid, hoch drob'n?
Wo'st unbekümmert schaugst ins weite Land -
Irdischer Hader nia Echo bei dir fand!

Ja, dös ham hoit ins're Vordan firti g'macht
Mit Schwitz und Plog ham's s' domals auffibracht
Sowas duat so leicht net wida kemma
Ma ko si a Beispui wohl dro nehma!...

So weiß, wia da Schnee und da boarisch Himmi blau
Beschütz'n soin dös Kreiz da Herrgott und insre liabe Frau.
Nacha dat's scho stimma, drum sei dös auch wohr -
Dazu wünsch ma jeden Woibergla a fridli g'sunds nei's Johr!

SE.

Der Ausschuß "Die Wallberger"

Egern-Rottach