Neujahrskarten 1970 - 1979

Zum Jahreswechsel 1969/70

Die warme Zeit is wieder rum
Die Herd'nglockn san verstummt
Die Vogl san verzog'n nach dem Süden
Verschniem san Wege, Woid und Wies'n.

Wo uns zur Zeit am meisten fesselt
is der Regierungs- und der Jahreswechsel
Mög die Regierung die Probleme meistern
Und's neie Johr uns mit vui Glück begeistern.

Vor allem Gsundheit wünscht a Jeder
allen Freunden und sich selber
Daß nit mangelt an Speis und Trank,
Dafür sei dem Herrgott dankt.

Was die Menschheit kaum erwartet,
die Amerikaner san gestartet.
Mit der Mondrakete, der bemannten
im gachen Flug zum Erdtrabanten.

Wias drom g'wen san die Austronauten,
Millionen es im Bildschirm schauten,
Drom bliem is natürli koana
und mitbrocht hams an Sock voi Stoana.

Jetzt ganz wos anders liabe Leut,
Achz'g Johr, des is a lange Zeit,
Denn da Woibergerverein hot heier
Sei achzigjährig's Jubiläum gfeiert.

Wos da Verein hot alle g'leist
Steht in da Chronik schwarz auf weiß.
Er steuert nun in aller Ruah
Dem hundertsten Geburtstag zua.

Lenz Kandlinger

1889   Die Wallberger   1970

Verein zur Erhaltung der Volkstracht Egern-Rottach

81 Jahre Wallberger-Verein

Zum Jahreswechsel 1970-71

Da Woiberg schaugt schier grimmi drein,
des is a gor koa Wunda.
Wos der oiss siecht Johr aus Johr ein
im Winta und im Summa.

De junga Leit wenn ma betracht,
wia's oft san beinanda
do kennt ma Mandl und Weibi fast
boid nimma auseinanda.

Manche Burschn lossn hänga
bis übas Gnack de langa Hoor,
man möcht zu der Ansicht kemma
de Maschkarade dauerts ganze Johr.

Und de Madl oft net wissn
gengans in Maxi oder Mini.
Damits an Summa nit so schwitzn
lafn's im Bikini.

Aba Brauchtum und Tracht Ihr liabn Leit
de san von eisernem Bestand.
Wünsch ma daß weiterhin so bleibt
in unserm Boarischn Oberland.

Allen Woibergern a guats Neu's Johr!

Lenz Kandlinger

Zum Jahreswechsel 1971/72

Wenn in der Nacht der Jahreswend
die Sterne funkeln am Firmament
wenn de Böller und Raketn krachan
vui Leit sich do Gedanken machan.

Wos des oide Johr uns brocht bis heit
an Kummer, Sorgen, Glück und Freid.
Trink ma an Neujahrspunsch drauf,
des neie Johr schaut nit rosig aus.

Oiwei mehra und no schlechta
werden de Gangster und Verbrecher,
de san do vom Deifi bsessn,
denn an Herrgott hams vogessn.

Loß ma uns de Ruah nit nehma
es werd scho wieda anders kemma.
Es lebt sie leichta nach wie vor,
mit guata Laune und Humor.

Drum nehmts de Zither in die Hand
und de Gitarr dort vo da Wand,
a schöne Musi, a lustigs Liad,
is guat fürs Herz und a fürs Gmüad.

Zum Jahreswechsel 1972/73

Kracha tuats an allen Enden,
und vui hunderte von Händen,
nehman's Glos und trink'n Prost,
a jeder vom neuen Johr des beste hofft.

Wenn ma an kloan Rückblick macht,
wos uns des oite Johr hot bracht,
vui Guats und Schlechtes obendrein,
es könnt ja a no schlimmer sein.

Des Schönste war do ganz bestimmt
die Olympiade z'Minga drin.
Von da ganzen Welt san's angetreten
zum friedlichen Wettstreit die Athleten.

Wos weniger erfreulich war
das war der Lärm zur Bundeswahl.
Es hot sie a harter Kampf entfesselt
um die begehrten Ministersessel.

Wieder hot kriagt die Oberhand
da Bundeskanzler Willy Brandt.
Wenn des wohr is wos vasprochen,
dann kann man auf guate Zeiten hoffen.

Wir aber bleiben stets die Oit'n,
treu am oit'n Brauch festhoit'n.
Helf ma zam wias bisher war,
dann hot's mit'n Woibergerverein koa Gfahr.

L.Kandlinger

Zum Jahreswechsel 1974/75

Wieda is a Johr am End
wo no grod de Zeit hirennt.
Ob's Weda schlecht is oda guat
mach ma weida mit frischem Muat.

Wens nit schlimma werd de Zeit
dann hot ma am Leb'n a Freid
daß jeda arbatn ko so vui er mog
und de Baurn vui Muich bringan an d'Wog.

Denn arbatn und produziern
und helle Köpf zum Regiern.
Wenn d'Leit si untanand vostehn
dann ko a Voik net untageh.

De Volksmusi is in guater Hand
durch de Musikschui im Tegernseer Land.
De Junga lernan fleißi und gern,
in vui Häusa ko ma's klinga hern.

Brauchtum, Musi und de Tracht
ham de Vorfahrn ins vomacht.
Das ma des Erbe pflegt und ehrt
des is insa boarische Hoamat wert.

Zum Jahreswechsel 1975/76

A guats Nei's Johr Ihr liabn Leit
Glück und Gsundheit alle Zeit
und vui Erfolg im nachst'n Johr
is insa Wunsch und des is wahr.

Wos des neie Johr ins bringt
koa Mensch de richtige Antwort find't.
Auf alle Fälle hoff mas Beste,
denn Trüabsal blasn war des Letzte.

Da Woiberg grüaßt im Wintagwand,
oba auf insa schön's Hoamatland.
Wenn's schön Weda is im Summa
kreisn de Drach'nfliaga drum umma.

Oft sans wia de Schmetterling auf seiner Plattn,
wenns nit steckt a da Nebekappn.
Schö is des Schweb'n und des Fliag'n,
solang koa Unglück duat passiern.

Wos de Woiberger scho lang hätt'n gern,
soi endli a moi Wirklichkeit wern.
A Vereinshüttn auf an schena Plotz,
wenn de Behörde nix dagegen hot.

Wenn ma's finanziell dakraft'n,
bei über 400 Mitglieder könnt ma's schaff'n.
Dann pack ma's o und helfn zam,
daß ma in Zukunft a Vereinsheim ham.

Lenz Kandlinger

Zum Jahreswechsel 1976/77

Ob klar ist die Sylvesternacht
wenns schneibt und waht da Wind,
durch de Raketn blitzt und kracht,
des Neie Johr sein Anfang nimmt.

Den Woibergern, ob oit oda jung
vui Glück und G'sundheit, weni Sorgen,
Freid am Leb'n jede Stund
und frisch und munter schon am Morgen.

Weil mit'n Vereinsheim nix vorwärts geht
hamma ins bis iaz umsonst bemüaht,
dazua insa Stammlokal nimma besteht,
denn die "Seerosn si voblüaht".

Seit 1919 is beim Kefer de Vereinsherberg gwen
und mir ham de Gastfreundschaft genossen.
In der langa Zeit, wenn ma bedenkt,
san vui Maß durch de durstin Gurgln gflossn.

Wos ins des Neie Johr no bringt,
an Hergott loß ma woitn.
Doch wias a kimmt, oans wiß ma g'wiß,
Wir bleib'n stets de Oit'n.

Lenz Kandlinger

Neujahr 1978

Es läuten die Glock'n um Mitternacht
an allen Enden blitzt's und kracht's.
Die Raket'n steig'n auf und nieda,
von de Berg her kimmt des Echo wieda.

Des oide Johr - es is am End,
des neie übernimmt des Regiment.
Die Zukunft schaut nit rosig her,
es is auf der Welt koa Frieden mehr.

Gar oft die Zeitungen und der Funk berichten,
von schlimmen Verbrechen und Terroristen.
Do lebt der oafache Mensch an ruahig'n Dog,
der nit z'vui Monett'n a da Tasch hot.

Wenn ma ans' vergangene Johr z'ruck denkt,
und's Hauptproblem der Woiberger kennt,
daß leider mit'n Vereinsheim nix geht zam,
solang ma zum Bau koa Genehmigung ham.

Die Woiberger Jugendgrupp'n is fescht beim Zeig,
sie platt'lt und tanzt, daß is a Freid.
Denn der Nachwuchs is der Garant,
daß der Verein weiterhin hot Bestand.

Zu erhalten Brauchtum und Tracht,
wias die Vorfahrn ins vermacht.
Drum mach ma weida wias bisher war,
Allen Woibergern a guats nei's Johr.

Lenz Kandlinger

Neujahr 1979

Wenns in da Sylverstnocht koit is und waht da Wind
dann is am schenstn am warma Ofen hint.
Üba ois mögliche werd dann dischkriert,
wos im vergangenen Johr is passiert.

Und wenns dann zwölfi schlogt und de Raketn steign
ko koana mehr auf sein Plots sitzen bleim.
Prosit Neijohr, de Gläser klingen
mög es Glück und Gesundheit bringen.

Im kemmatn Johr, es is soweit,
erwart uns a grouße Festlichkeit
denn jeda Woiberger woaß, on Huber oder Maier,
daß da Verein des 90jährige Jubiläum feiert.

1889 ham si 36 Mannaleit troffn
und ham den Woibergerverein ins Lebn gruafn,
Es warn Leit mit Verstand und Herz,
es war beim Bartlmä in Egern am 24. März.

Üba 400 Mitglieda zählt heit da Verein,
aba leida no koa eigenes Heim
und de Aussichtn san no schlecht,
Wo is de Freiheit und s'Menschenrecht.

Laß ma ins den Muat nit nehma,
es werd scho wieda anders kemma
und mit Zuversicht und Gottvertraun
dem neien Johr entgegen schaung.