Neujahrskarten 1980 - 1989

Es leucht der Mond, es funkeln de Stern,
des oide Johr sogt sogt, habts mi gern,
weils neie Johr sein Anfang nimmt,
hoff ma's Best vo dem wos kimmt.

Wos im vergangenen Johr is gwes'n
werd vo uns koana mehr vogessn.
Des größte Ereignis des steht fest
war des 90jährige Gründungsfest.

Beim Festabend da war was los,
im groußn Zelt in birkenmoos.
G'sunga hams und tanzt und plattlt,
daß de ganze Tanzbühn hot g'wacklt.

Am Festsunda drauf wars Weda schlecht
d'rum feierte man den Festgottesdienst im Zelt.

Mäuserl schdad war's wia ma's a da Kirch nur kennt,
um so lebhafta is hernach bei de Ehrtänz gwen.

Wos natürli de Woiberger am meisten bewegt,
daß endli mit dem Vereinsheim wos vorwärts geht.
Die Baugenehmigung is kema vom Landratsamt,
drum ham's a glei mit'n Bau'n o'gfangt.

Mit'n ausbaggern und eischäuna hot's pressiert,
de Grundmauern und da Kella san betoniert.
Und im Fruahjohr wenns Weda nit schiniert,
werd de Bernauer Winterschtum obrocha und raus transportiert.

Nach 90jährigem Vereinsleben is dann so weit,
daß den Woibergern a eigenes Heim steht bereit.
Allen Mitgliedern Glück und Gesundheit
im Neuen Johr und jeder Zeit.

Lenz Kandlinger

Wenn man zur Zeit der Jahreswend,
an die vergangenen Tage denkt,
was da gleist word'n is für den Verein
da kann jeder Wallberger zufrieden sein.

Daß ma zur Bernau hintre hat kinna
war die Gemeinde mit Schneefräßn drinna.
Wia dann der Weg zur Winterstub'n war frei
is glei mit'n Abreißn oganga Ende Mai.

Fest is g'werklt word'n vo de Alt'n und Junga
drum war in a paar Tag da Abbruch uma.
Mit'n Transport is a schnell ganga,
den ham de Gemeinde, da Saur und da Derndl übanomma.

Im Lori Feichta hint am schöna Platz
wo a da Schiclub sei Waldfest hat
war die Wallbergerhüttn auf g'stellt in kurzer Zeit,
denn vui Mitglieder waren zum Helfen bereit.

Da Vorstand Sepp Stadler, da Webamo,
hot si vui kümmert, daß da Bau geht voro.
Da Toni, Stefi, Michl, Hans, Sepp und Klaus
und so weida, da gengas gar net aus.

man kanns net all beim Nama nenna,
san in da Freizeit zum Arbatn kemma.
Drum feierte man am 10. August, des steht fest
bei der Vereinshütt'n s'erste Wallbergerfest.

Für Veranstaltungen und Plattlerproben is iaz a so weit,
daß uns a Vereinsheim zur Verfügung steht jeder Zeit.
Wenn a die Zukunft schaut nit rosig aus,
mach ma uns nit z'vui Sorgen draus.

Allen Wallbergern Gesundheit Glück und Segen
im Neuen Jahr und auf allen Wegen.

Lenz Kandlinger

Zwisch'n dem Wallber und der Bodenschneid,
Gott sei Dank muaß ma song, iaz is so weit,
wo ma in Richtung Enterrottach geht,
de schöne Wallberger-Vereinshütten steht.

Die Einweihung der Hütte war Ende Mai.
Vui Vereine war'n mit den Fahnen dabei.
Die Vorderfront war mit Girlanden geschmückt,
und die Teilnehmer war'n von der Feier beglückt.

Alle san sie kemma in der schönen Tracht.
Die Dirndl und Frauen in Miada und Schalk
und die Jugendgruppen war'n guat vertreten.
so bleibt der Verein in Zukunft bestehen.

Die Schubertmesse, von Pfarrer Siegl zelebriert,
wurde mit Gesang und Musik von Sepp Kandlinger dirigiert.
Hernach hat Vorstand Sepp Stadler das Wort ergriffen
und den Aufbau der Hütte ausführlich umrissen.

Bürgermeister Max Engelsberger hat vor allem betont,
daß sich die Hütte besonders für die Jugend lohnt.
Schirmherr Landrat Gröbl wünschte dem Verein
für die Zukunft weiteres Glück und gedeih'n.

Auch den Gartenbauverein derf ma nit übergehen,
er hat den Innenraum mit Blumenschmuck versehn.
Durch die große Beteiligung wurde der Platz immer enger,
den Vortritt hatten die Mitarbeiter und Spender.

Wenn ma so z'ruck schaut am End vom Jahr,
wia vui Veranstaltungen in der Hütten scho war'n.
Und bei de Plattlerproben, de Großen und de Kloan,
fühl'n sie in da Vereinshütt'n so vui wia dahoam.

Wia a große Familie sitzt ma oft grüabi beinander,
so werd's a in Zukunft sei und nit anders.
Frohe Weihnachten allen Wallbergern ob alt oder jung,
a guats neu's Jahr und bleibts g'sund.

Lenz Kandlinger

Is s'Weda schee, da Himmi blau,
wenn ma hinauf zum Woiberg schaut,
scho 90 Jahr schmückt a Kreuz unsern Berg
und des war natürli a Gedenkfeier wert.

Weil die Farb am Kreuz war verblichen,
hat's da Roxin wieda frisch gstrichen.
Junge Woiberger ham si bemiaht
und as Kreuz zur Bergmeß geziert.

Da Ruapn Sepp und seine Männa,
san a an Woiberg auffi kemma.
Si ham uns a feine Musi bracht,
bloß s 'Weda hot nit so recht mitgmacht.

In da Vereinshüttn werd vui tanzt und glacht,
weil's oid und jung a rechte Freid macht.

So woin ma hoffn, daß oiwei so bleibt,
daß unsare Junga weiterhin s'Tanzn so gfreit.

Auch gibt's bei uns koa Hasch und koa Kokain,
des is bei uns Trachtler einfach net drin.
Es is gscheida, mia bleim beim Gerstnsaft sitzn,
ois wia uns des teiflische Zeig in d'Adern nei spritzn.

Aa üba d'Arbeitslosigkeit werd überoin gredt,
a diam is aba scho wirkli a rechts Gfrett.
Üba zwoa Milliona, des san z'vui,
hoffentli werns weniga, so Gott wui.

Doch mia woin weiterhin an Brauchtum treu bleibn,
wia si des ghört in an Trachtenverein.
Drum mach ma weida wia's bisher war,
allen Woibergern a guats nei's Jahr.

Am End vom Jahr in der Sylvesternacht.
wenn's an allen Seiten blitzt und kracht
und de Leuchtraketen steig'n und pfeifen,
viele zum Prosten dann zum Glasl greifen.

Wenn man oan kloan Rückblick macht,
wos uns des oide Jahr hot bracht:
vui Guats und Schlechtes oben drein,
es könnt immerhin no schlimmer sein.

Jeden letzten Sonntag im Monat trifft ma sich
zum Frühschoppen im Vereinsheim hint.
Über ois mögliche werd dischkriert,
weil's zum Hoamgeh koan pressiert.

Bei de Veranstaltungen is zünfti und lustig
und die Mannsbuida oiwei recht durstif
und liaba singa und musiziern
ois wia andauernd politisiern.

Mit der Weltraumfähre sana gflogn gar weit
zu erforschen die Schwerelosigkeit.
Weil's droben ham vom Himmi tramt,
hätten's de Landung boid versamt.

Allen Woibergern, ob oid oda jung,
a guats neu's Jahr und bleibts gsund.

Lenz Kandlinger

Am letzten Tag, in der Sylvesternacht,
wenns an allen Enden blitzt und kracht,
des neue Jahr sein Anfang nimmt,
hoff ma's Beste vo dem was kimmt.

Des vergangene Jahr ko ma nit lobn,
vui Unglück hats gebn und Katastrophen.
Der Summa der war naß und wiascht
um so schöna war da Hirgst.

Was woi des neue Jahr bringt mit?
Vielleicht is bessa, mia wissns nit.
Die Welt is voi Zwietracht und Streit,
wo bleibt da der Frieden und die Einigkeit?

Aber mia hoitn fest zu unserer Tracht,
des ham ma uns zur Aufgab gmacht.
Denn 95 Jahr sans heuer worn,
daß der Woibergerverein is geborn.

Was der Verein liab und wert,
wird von uns gepflegt und geehrt.
A boarische Musi, a Oimaliad,
und im Herzen die Hoamatliab.

Allen Woibergern a guats neu's Jahr

Lenz Kandlinger

Die Glockn läutn und Böller krachen,
Raketen und no andere Sachen,
weil wieda a neis Jahr  beginnt -
wia schnell daß do de Zeit verrinnt.

Denn oa Jahr ums andere geht uma,
noch'n Winta kimmt da Summa.
Und wenn oan 's Lebn a no so gfoit,
dawei ma umschaugt is am oit.

Da Reagan und da Gorbatschov ham se troffn,
nach dem Gipfltreffn woin ma hoffn,
daß weida redn und anand vertraun
und net de ganze Welt zammahaun.

Mia hoitn fest zu unsrer Tracht,
dös ham ma uns zur Aufgab gmacht.
Wos den Vorfahrn liab und wert,
werd vo uns stets pflegt und g'ehrt.

Und so woin mas wieder weita gem,
an dene, de wo nach uns lebn.
A boarische Musi, a Oimaliad
und im Herzn de Hoamatliab.

Allen Woibergern a guats Neus Jahr.

Lenz Kandlinger

Des oide Jahr schleicht si davo,
a neis kündt si mit Kracha o.
Was 's uns bringt? - Mir wissn's net,
d'Hauptsach is, daß weida geht.

Mia wissn bloß, wia 's oide war,
in da Welt draußn war's net recht rar.
Terroristn ham Leit auf da Straß daschossn
und Flugzeuga hams sprenga lassn.

In Rußland hat's a Atomwerk zrissn,
des ham mir oisam biaßn miaßn.
Im Rhein drin gibts kam no an Fisch,
weil an Haufn Gift neiglaffn is.

De Gwerkschaft hat de Neie Heimat vakafft,
grad guat, daß des bei de Wallberger koana schafft.
Unsa Hüttn kon koana nehma,
und für d'Wallberger war des Jahr vui schöner.

's Wallbergerfest is sehr guat ganga,
unsa Jugend, de hoit prima zamma.
Und d'Wirtsleit in da Hüttn drinna,
mit hättn koana bessan findn kinna.

Drum wenn's bei uns so weita geht,
a jeder zu seina Hoamat steht,
dann hot's für d'Wallberger koa Gfahr.

Allen Mitgliedern a guats neus Jahr.

Hans Kandlinger

Jetzt is des Jahr scho wieda umma,
den oan hat's Freud bracht, den anan Kumma,
koana woaß, was 's Neue bringt,
mia miaßns hoit nehma, wia oiß kimmt.

Es is net olles goldern gwen,
was im letzt'n Jahr is gscheng.
Erdrutsch, Sturm und Überschwemmungen,
san in ganz Europa gwen.

An da Börse gas an Riesenkrach,
de Aktien gaben alle nach,
da Dollar is ganz obegfalln,
am Best'n is oiwei no mit D-Mark zoin.

Doch von all de Katastrophen
warn mia am wenigsten betroffen.
Da Summa war zwar recht varengt,
doch da schöne Herbst hat uns wieda vasöhnt.

Wenns bei de Wallberger a so weita geht,
a jeda zu seim Schanzl steht,
dann konn ma gwiß von olle hörn,
bei dem Verein, da san ma gern.

Und so solls sei, und so is sche,
na ko da Verein net untageh.
Und zum Schwarzsehng hod koana an Grund,
a guats neus Jahr und bleibts recht gsund.

Hans Kandlinger

Jetz is des Jahr scho wieda vorbei,
des Oide geht, es kimmt des Neie.
Ma moant de Zeit lafft schneller von Jahr zu Jahr,
kam hats gscheit ogfangt, scho is gar.

Abrüstung solls gebn, an sichan Frieden,
hat uns da Gorbatschow beschieden.
Mit dem Regan hat er sich troffn,
und a mitm Kohl, des laßt uns hoffn.

Und koana wünscht si a an Kriag,
glangt scho was so alles passiert.
In Rußland hats a Erdbeben gebn,
Zehntausende hats kost eana Lebn.

Flugzeug san obgstürzt, Schiffe gsunga,
bei Überschwemmungen san vui dadrunga,

Zugunglücke, Brandkatastrophen,
dank ma Gott, daß mir net warn betroffen.

Doch is bei uns a trauert worn,
unser Landesvater Franz Josef Strauß is gstorm.
Er war uns stets a guata Regent
und jeder Bürger hatn kennt.

Für uns Wallberger war's Jahr net schlecht,
's Fest hat highaut, 's Wetter war recht.
Und jeds Mitglied freut si bestimmt
und des Fest, was im neuen Jahr kimmt.

Denn 100 Jahr wern d'Wallberger heuer,
Leut, des gibt a grouße Feier.
Drum wünsch ma Euch net bloß aus diesem Grund
a guats neus Jahr und bleibts recht gsund.

Hans Kandlinger