Neujahrskarten 1990 - 1999

Zurück zur Übersicht der Neujahrskarten

 


Jahreswechsel 1989/90

 

Des oide Jahr schickt si zum gehn,
ma werd no lang vo '89 redn,
wos ma in China no mit Waffn unterdrückt,
des is in Osteuropa geglückt.

Wos vor kurzem no für unmöglich goitn,
de Demokratie hat im Ostblock Einzug ghoitn.
De Deutsch-Deutschn Grenzen san durchlässig worn,
de Berliner Mauer hat ihrn Schrecken verlorn.

De Politiker aus Ost und West
bemühn si um an Weltfrieden aufs Best.
Erstmals war a russischer Präsident sogar
beim Papst zur Audienz des Jahr.

Doch leider hats trotz alledem
a einige Katastrophen gebn,
mir warn net direkt davo betroffn,
daß des a nia gschicht, des wolln ma hoffn.

 

A für uns Wallberger wars a historisch's Jahr,
weil da Verein grad 100 war.
Gfeiert ham mir, und des gescheid,
mitgholfn ham olle Leit.

Ob Alt, ob Jung, ob Frau, ob Mo,
für d'Wallberger warns olle da.
Es is tanzt und gspuit und gsunga worn
und highaut hat ois, vo hint bis vorn.

Doch wenn jetz a neues Jahr beginnt,
und jeder sich auf d'Hoamat b'sinnt,
und ois so zammhoit wia letzts Jahr,
dann hats für de nachstn 100 a koa Gfahr.

Allen Wallbergern a guats Neus Jahr!

Hans Kandlinger


Jahreswechsel 1990/91

 

Wenn des Jahr an End zuageht,
des Neue vor der Haustür steht,
a jeder amoi nochstudiert,
wos is letzt's Jahr ois passiert.

Des Wichtigste war doch gwiß,
daß Deutschland wieder vereinigt is,
die ehemalige DDR
wieder zu uns zuawa g'hört.

Ost und West rückt näha zamm,
de Großmächte ziagn an oan Strang.
Vernunft kehrt bei de Politiker ei,
mitn kaltn Kriag is jetzt vorbei.

Bloß da Saddam konns net glabn,
er trommelt seine Truppn zamm.
Er is in Kuweit einmarschiert
und bedroht de Welt mit Kriag.

 

Da Bundestag is a gwählt worn,
da Kohl und da Genscher wieder vorn.
Des 90er Jahr geht in die Geschichte ei,
ma ko damit zufrieden sei.

Bei uns im Verein is trauert worn,
unser Ehrenvorstand, da Lukas Lenz is gstorm,
kennt hat den fast a jeds Mitglied,
er war lang Schriftführer und Verslschmied.

A bei de Wallberger is Neuwahl gwen,
de älteren Ausschußmitglieder ham ihre Postn abgebn.
De Vorstandschaft is stark verjüngt,
i bin ma sicher, daß der Verein damit gwinnt.

Jetz gehts auf mit frischem Muat,
neue Besn kehrn bekanntlich guat.
A guats Neus Jahr und oiwei gsund sein,
des wünscht Euch der Wallberger Verein!

Hans Kandlinger



Jahreswechsel 1991/1992

 

Wenn ma draußn steht in da kaltn Neujahrsnacht,
und wenns an olle Eckn blitzt und kracht,
a Jeder amoi nachstudiert,
was is denn 's letzte Jahr passiert.

Da Saddam hot sein Kriag valorn,
is vo de Ami zruckdrengt worn.
In Bangladesch hats a Überschwemmung gebn,
Hundertausende hats kost des Lebn.

Auf de Philippinen is sogar
a Vulkan ausbrocha nach 600 Jahr.
Und in Jugoslawien, a so a Schand,
da bekriagn si de Einwohner gegaranand.

In Österreich, an Ötztal hintn
deans an 4000 Jahr altn Tirola findn.
Was san dagegn de hundert Jahr,
de unsa Wallberger-Verein jetz war?

 

Doch feiern soll ma, wann ma ko
und d'Wallberger verstehnan was davo.
Heuer feiern mir aus a Neus,
100 Jahr steht's Wallberg-Kreuz.

Für ois, was er für d'Wallberger hat do,
is Ehrenvorstand worn da Webermo.
A an Kajetan hamm's zum Ehrenmitglied ernennt,
weil er tagaus - tagei fürn Verein is grennt.

Da Wallberger-Verein is voll auf da Höh
und es werd a so weida geh,
denn olle ziang am gleichen Strang
und olle Mitglieder hoitn zam.

Hoff ma, daß a in Zukunft nix feit,
a guats neus Jahr, ihr liabn Leit.

Hans Kandlinger


Jahreswechsel 1992/93

 

A gscheida Winta, a truckas Fruahjahr,
a schena Summa, a nasser Hiargscht,
und scho wars Kahr umma.
Fast wia im Flug, so kimmt'S oan vür
scho steht des Neue vor  da Tür.

Und doch, wenn ma so nachsinniert,
is letzt's Jahr allerhand passiert.
In Jugoslawien is Bürgerkriag,
da geht's zua, daß oan glei friert.

Oi paar Wocha hat ma ghört und gles'n,
san Bus-, Zug- und Flugzeugunglücke gwesn.
In vui Länder is Hungersnot,
Vui ham net amoi a Stückä Brot.

Tausende ham unser Land zum Ziel,
Und ersuachan bei uns um Asyl.
D'Leit, de gengan auf de Straß,
de Oan für, de Andern gega Fremdenhaß.

Doch von all dem, so wuin mir's Hoff'n,
warn de Wallberger net betroff'n.
De Jahr geht in die Chronik ei,
ois oans, wias schöner kam ko sei.

 

100 Jahr Wallbergkreuz,
da san de Wallberger bsonders stolz
und mit Mess, Musik und Beleuchtung
is g'feiert worn des Jubiläum.

Und genau 100 Jahr san vaflossn,
daß d'Wallberger ham Freundschaft gschlossn,
mit de Studenten vom Corps Vitruvia
und sie hat ghalt'n all de Jahr.

Und wenn a Freundschaft so lang hoit,
in guata und in schlechta Zeit,
dann sich i a koa Gfahr
für de nachstn 100 Jahr.

Den Wallbergern und dem Corps Vitruvia
bleibt's alle gsund,
a guats neu's Jahr.

Hans Kandlinger

 


Jahreswechsel 1993/94

 

Wenn das alte Jahr verrinnt,
a jeder sich nach rückwärts bsinnt,
was is g'wen im letztn Jahr,
ob ma damit z'frieden war.

In da Türkei hat d'Erdn bebt,
tausende ham net überlebt.
In Jugoslawien is no oiwei Kriag,
de UNO is in Somalia einmarschiert.

In Amerika hats Land überschwemmt,
durch Woidbrand san vui Häuser verbrennt.
In Rußland hams an Aufstand g'habt,
da Jelzin hats grad no dapackt.

In unserm Landl wars a net grad rosi,
Tausende von Arbeitslose,
unsa Staat hot hint und vorn koa Geld
hoffentli werd heuer richtig g'wählt.

 

Doch es is oi Jahr des Gleiche,
es gibt Arme, es gibt Reiche.
De oan ham Elend, Not, Vadruß,
de andan hams im Überfluß.

A unsa Summa war net da Best,
vaschwoabt hats uns des Wallbergerfest.
Doch damit könnan mir lebn,
des hats de letzten Jahr scho öfter gebn.

Des Vereinsjahr is harmonisch verlaffn
und gemeinsam wern mas schaffn,
daß des Nagste grod so werd
und koana unsan Zammahalt stört.

Allen Wallbergern a guats neus Jahr!

Hans Kandlinger


Jahreswechsel 1994/95

 

Und wieda is a Jahr vorbei
ma konns kam glabn, es geht so schnei.
Ma mecht a diam, de Zeit bleibt steh,
es huift nix, si muaß weida geh.

Was is im letztn Jahr passiert?
Im Balkan is no oiwei Kriag.
A paar Schiffe san vasunga
und vui Leit dabei dadrunga.

Des Superwahljahr is vorbei,
z'friedn war net jede Partei.
Da Kohl is wieda Landesvorstand,
da Stoiber regiert 's Bayernland.

Da Winta hat si schwar eig'hängt,
im Früahjahr da hats g'schniebn statt g'rengt,
umg'falln san de ganzn Mastn,
ham koan Strom ins Tal mehr lassn.

 

Doch dann is a Somma kemma,
seltn war no oana schena.
Sämtliche Fester hams auf Anhieb g'hoitn,
's Wallbergerfest war a Erfolg wia seltn.

Doch unser Höhepunkt war heuer
bei de Wiener Wallberger de 100-Jahr-Feier.
An großn Bus ham ma organisiert,
san hieg'fahrn und ham gratuliert.

Bei uns Wallbergern hat ois guat klappt,
mir ham a guats Vereinsjahr g'habt.
Alles war ganz wunderbar
Allen Wallbergern a guats neus Jahr.

Hans Kandlinger


Jahreswechsel 1995/96

 

Ma möcht's kam glab'n, doch es is wahr,
es is scho wieda um a Jahr,
und vui, was ma moant es war wichtig gwesn,
hat ma dawei scho wieda vergess'n.

In da Nordsee, ma traut sichs kam denga,
wollt'n d'Englända a Ölplattform vasenga.
Ganz Europa hat dagegn protestiert,
dann ham sie's do nimma riskiert.

Frankreich hat ganz unscheniert
seine Atombombn ausprobiert.
De ganze Welt hat si empört,
doch de hat des wenig g'stört.

In Jugoslawien ham's beschloss'n,
es soll an Fried'n gebn, an groß'n.
Doch so recht glaubt's koana wohl,
daß desmoi a Ruah sei soll.

An Rabin ham's daschoß'n in Israel,
es is a Israeli g'wen.

 

Und warum - ma konns kam glab'm,
weil er wollt an Fried'n ham.

Doch bei uns is gottseidank a Ruah,
da geht's wenigstens no friedlich zua.
20jährigs Jubiläum Gaujugendtag war heuer,
in unserer Hütt'n war die gelungene Feier.

S'Wallbergerfest hat auf Anhieb klappt,
da Petrus hat a Einsehn g'habt.
Beim Kathreintanz ham ma tanzt
im Kongreßsaal draus
und zwar vor ausverkauftem Haus.

Ois hat hig'haut wia am Schnürl,
Allen Mitarbeitern an Dank dafür.
Und sollt was net hig'haut ham,
na seit's net zwida,
A guat's Neu's Jahr, bis nagst's Jahr wieda.

Hans Kandlinger


Jahresweschsel 1996/97

 

Ma möcht's kaum glaub'n, des Jahr is rum,
und wenn ma zrucksinniert,
dann is in dera kurzn Zeit
doch allerhand passiert.

In Afrika san d'Leit auf da Flucht
vor Stammeskriag und Fehden,
doch a in de Flüchtlingslager
hams kam a Chance zum Überleb'n.

In England wern tausende von Rinder
g'schlacht und dann vernicht,
weil sonst a der Rinderwahn
de Menschen z'grundricht.

In Rußland hat die Wählerschar
an Jelzin wieder vornhing'sellt
und a in Amerika
hams an Clinton wieder g'wählt.

 

Bei uns wern d'Arbeitslosen oiwei mehra
und 's Leb'n werd ganz schö teuer,
denn der Staat verlangt von uns
oiwei no mehra Steuer.

Doch im Verein is 's Jahr guat glaffn,
's Wallbergerfest war a Erfoig,
und es werd weita tanzt und plattlt
und nachst's Jahr wiederholt.

Vor Langewil und Traurigkeit
da hat's bei uns koa G'fahr,
mia wünschen allen Mitgliedern
a recht a guats neus Jahr.

Hans Kandlinger


Jahrrswechsel 1997/98

 

Wenn's kracht und scheppert umadum,
dann is's so weit, des Jahr is um.
A neus geht wieda o,
ob's guat werd a - mir hoffn's do.

Was werd vom oidn im Gedächtnis bleim?
Ma kannt jed's Jahr des Gleiche schreim,
vo Raub und Mord, vo Flugzeugkatastrophen,
vo Hungasnot und Arbeitslosen.

Doch hoit, d'Muatta Theresa de is gstorm,
und d'Lady Di hams durch an Unfall valorn.
De Überschwemmung im Ostn drent.
de hams Jahrhunderthochwasser gnennt.

 

In Italien hot d'Erdn bebt,
de Leut ham in Angst und Schreckn g'lebt.
De Kirch von unschätzbarem Wert
in Assisi is zerstört.

Doch des is bei uns net da Fall
in unsan wundrschöna Tal.
Drum dank ma unserm Hergott schön,
daß mir in Friedn da kennan leb'n.

Drum deat's net woisln wenns rengt oda schneibt,
oda a Woch moi d'Sonn ausbleibt,
amoi a scharfs Weda hot sogor.
In diesem Sinn - a guats neus Jahr.

Hans Kandlinger

 


Jahreswechsel 1998/99

 

Wenn d'Christbam brennan umadum,
dann is des oide Jahr bald um,
mit stimman uns auf's Neue ei,
wer woaß, was da werd olles sei.

Im Fernsehn hat mas g'hört und g'sehgn,
was im vergangna Jahr is gscheng.
Am meistn betroffn gmacht hat uns des Zugunglück,
des bisher schwarste in unserer Republik.

In Griechenland ham d'Wälder brennt,
halb China war von Wasser überschwemmt.
In Nicaragua und Honduras, da hat's g'haust,
Sturm, Erdrutsch und Wasser, daß's oam graust.

 

Da Clinton hat an Fehltritt do,
alle Medien berichten davo.
D'Ami ham si do so aufgegn könna,
am Liabsten dadns eam sein Posten nehma.

Mia ham a neue Regierung kriagt,
moi schaugn, wohi daß de uns ziagt,
machan sie's andast, oda wurstlns genau so weida,
in a paar Jahr da san ma gscheida.

Bei uns herin im Tal dagegn,
hat's koane größern Sorgen gebn.
Drum gehn ma jetz in oller Ruah
mit grouße Schritt aufs Jahr 2000 zua.

Allen Wallbergern a Guats, Neus Jahr.

Hans Kandlinger